காதலென்றாகுமோ ?

கண்ணோடு கண்மோதி 

தெறிக்கும் பொறியின் கனலாகி

நெஞ்சோடு நெஞ்சிணைந்து  உணர்வுகள் 

பாய்ந்தோடும் நதியாகி

காற்றோடு கரைந்தோடும் மேகங்களாய்க்

கலைவதே காதலென்றாகுமோ ?

விரலோடு விரல்கோர்த்து

மகிழும் கணங்கள் மலராகி

மனதோடு மனதிணைந்து நினைவுகள்

மணமூட்டும் காற்றாகி

மண்ணோடு வீழ்ந்தேகும் இதழ்களாய்த்

தவிப்பதே காதலென்றாகுமோ ?

கரையோடு அலையாடி

உருகும் கணங்கள் அமுதமாகி

உயிரோடு உயிரிணைந்து ஆசைகள்

ஆர்ப்பரிக்கும் கடலாகி

கடலோடு கரையும் நுரைகளாய்த்

தொலைவதே காதலென்றாகுமோ ?

வானோடு முகில்கூடி

பொழியும் துளிகள் மழையாகி

மண்ணோடு மண்ணிணைந்து தளிர்விடும்

பசும்புல்லின் உயிராகி

வெயிலோடு காயும் பனித்துளியாய்க்

காய்வதே காதலென்றாகுமோ ?

சுருதியோடு லயம்கூடி

எழும்பும் நாதம் இசையாகி

நெஞ்சோடு நெஞ்சிணைந்து ராகங்கள்

தாலாட்டும் கீதமாகி

காற்றோடு கரையும் ஒலியலைகளாய்த்

தேய்வதே காதலென்றாகுமோ ?

விழியோடு ஒளிகூடி

எரியும் சுடரின் ஒளியாகி

உடலோடு உடலிணைந்து மோகங்கள்

உருகிடும் மெழுகாகி

இருளோடு மறையும் நிழல்களாய்த்

தொலைவதே காதலென்றாகுமோ ?

இரவோடு துணையாகி

வழியும் இரகசியம் கனவாகி

நினைவோடு நினைவிணைந்து காலங்கள்

உறைந்துபோகும் நிஜமாகி

விடியலோடு கரையும் விண்மீன்களாய்க்

கலைவதே காதலென்றாகுமோ ?

சக்தி சக்திதாசன்