மலையிலே பிறந்த ஊற்று
மடை திறந்த வெள்ளமாய்
மணற்படுகை வழியோடி
மகிழ்ந்தோடும் நதியாக
மனம்மகிழ்ந்து துள்ளியாடும்
மீன்கள் அதில் விளையாடும்
கரையோரம் வளர்ந்திருக்கும்
காட்சிநிறை பசுமைதனை
நீரூற்றி செழிப்பாக்கி
நிலமெலாம் ஈரம் விதைத்து
வளைந்தோடும் வழிசமைத்து
விரைந்தோடும் நதிமங்கை
பாறைகளில் பட்டுத் தெளித்து
பன்னீர் புஷ்பங்களாய் மலர்ந்து
தவித்திருக்கும் மக்கள் மகிழ்ந்திட
தாகம் தீர்த்து பயணிக்கும்
ஆறாகப் பெருக்கெடுத்து ஓடும்
அந்தஸ்து பார்க்காத அன்புப் புனல்
இயற்கையன்னை வரமன்றோ
இறையருளின் கொடையன்றோ
யார் கேட்டு யார் கொடுத்தார் ?
ஊர் வாழ்ந்திட ஊற்றாய் உருவாகி
இடையறாத வேகத்துடன் ஓடும்
இன்பமூலம் அந்த நதியென்பேனோ ?
ஓடுகின்ற நதிமகளின் பயணம்
தேடுமொரு ஆழியை ஆறாமல்
வழியல்லாம் பல உயிர்களை
வாழவைத்து அந்நதி தொடரும்
வாழ்வெமக்கு இனிக்க வேண்டுமெனில்
வாழவேண்டும் அந்நதியைப் போல
சக்தி சக்திதாசன்
